De Veräin vun der Nouspelter Emaischen wëll hire Clienten ee GROUSSE MERCI soe fir dee mega Interessi un de Péckvillercher vum Joer 2021. Och wann fir eng zweete Kéier d’Emaischen op traditionelle Wee huet missen ausfalen, war et eis eng immens Freed, déi bestallte Modeller um Ouschterméinden am Péck-Away ze verdeelen. Innerhalb vun ee puer Deeg waren all Modeller ausverkaaft, dëst huet eis gewisen, dass Dir eis trotz schwéieren Zäiten net am Stach loosst. Dofir wëlle mir eis bei Iech bedanken an hoffen drop, dass mir eis 2022 nees bei engem gudde Patt op Ouschteren zu Nouspelt op der Duerfplaz kënne gesinn.
D’Virfreed fir d’nächst Joer ass weiderhi grouss. De Programm steet schonn a mir hoffen Iech all zuelräich um Ouschterweekend kennen ze begréissen. Hei ass ze verhalen den Datum vum 16., 17. an 18. Abrëll. Samschden ass ganz traditionell Party mat de Providers am groussen Zelt ugesot. Sonndes suergen Draufgänger aus Éisträich ënner anerem mat hirem Hit Cordula Grün fir Stëmmung. An Méindes päifen d’Péckvillercher wéi gewinnt duerch d’Stroosse vun Nouspelt, dobäi ass de ganzen Dag iwwer vill Programm fir Grouss a Kleng geplangt.
Des Weidere wënscht de Veräin vun der Nouspelter Emaischen eng gutt Gesondheet a schéin Ouschteren. Bis d‘nächst Joer, wann d’Péckvillercher fir ee ganze Weekend nees duerch d’Stroosse vun Nouspelt päifen.
Péckvillercher 2021
Vaccino
De Vaccino ass de klenge Brudder vum Corina, dem Péckvillche vum Joer virdrun a béid si vun der Ligue HMC. Mat der Sprëtz an dem Vaccin, weist eis dee klenge Péckvillche wéi een sech virum Coronavirus schütze kann. Den Impfstoff, deen aus richtegem Power besteet, ass déi perfekten Dosis fir hien an seng Matmënschen.
Schützt iech – impft iech!
Vum Vaccino sinn 800 Modeller hiergestallt ginn. Dësen Model ass ausverkaf.
Usch
Den Usch ass ee Péckvillchen, gemaach vun engem traditionelle Aulenbäcker. Net nëmmen dréit säi Meeschter déi selwecht giel Kapp, mee si ginn och nach allen zwee mam selwechten Numm geruff. Geformt vum Eugène Biver aus Nouspelter Leem, ass den Usch duerch an duerch een „Echt Nouspelter“. Beim Usch ginn et am Ganzen 200 Modeller. Dësen Model ass ausverkaf.
Harry
Den Harry ass ee Péckvillche geformt vum Marcy Biver. Schonn zejoert hat d‘Marcy groussen Erfolleg mat sengem Spero. Dëst Joer ass et dann um Harry, ee Péckvillchen deem een ofgesäit, dass et ee Fatzbeidel ass. D’Hoer sti schéi frech an d’Luucht an dee Schniewel versprécht näischt Guddes an der Kopp.
Vum Harry ginn et 160 Modeller. Dësen Model ass ausverkaf.
Jedi
De Jedi ass den éischte Péckvillche vum Jeanne Diener, dofir steet och den Numm. De klenge ronne Villchen ass mat vill Freed a Léift um Handwierk entstanen a bréngt säi Besëtzer mat deene léiwe ronnen Ae sécher zum Laachen. Grad a sou Zäiten ass ee Laachen dach ëmmer wëllkomm.
Am ganze goufen 100 Modeller vum Jedi produzéiert gin. Dësen Model ass ausverkaf.
D’Lamaischen
Den Outfit setzt an d’Hoer leie perfekt, ee leschte Bléck an de Spigel a schonn ass si prett, ganz nom Motto: Life is beauty-Vull. Elo huet Lamaischen, nom Vullejemp an dem Schrovillchen, hire groussen Optrëtt. Dëse Péckvillchen ass, sou wéi hier Virgänger, vum Marc Einsweiler an d’Liewe geruff ginn. An fir dass der Maus, also dem Péckvillchen, och näischt geschitt, ass si sécher an hirem Beauty-Kéis verpaakt.
Et goufen 250 Modeller vun der Lamaischen hiergestallt. Dësen Model ass ausverkaf.
